М. Бигиев мирасыннан хәзерге заман галимнәренең кайберләренә генә билгеле булган гыйльми әсәр. Сезнең алдыгызда галимнең дини хокук өлкәсендәге эзләнүләренең күренекле үрнәге. Мөҗтәһидләрнең тырышлыклары нәтиҗәсендә барлыкка китерелгән ислам хокукы, мөселманнар өчен тыелган һәм рөхсәт ителгән ризыкларга караган гади генә мәсьәләдә дә, кямиллектән һәм катгый бермәгънәлелектән ерак тора. М. Бигиевның фикерләү рәвеше аерым бер кызыксыну уята: үз карашларын көчләп такмый гына, ул, борынгы галимнәрнең шәригать кагыйдәләренә карата булган карашларыннан “изгелек пәрдәләрен” салдырып, укучыда: “мөстәкыйль нәтиҗәләр ясарга кирәк”, дигән фикер уята. "Муса Бигиев мирасы" сериясеннән булган әлеге китап татар телендә беренчесе, әсәрнең 1914 нче елда басылып чыккан асыл нөсхәсенең күчермәсе белән дә тәэмин ителгән.